Aapparisamik persuttaasarneq?

Aapparisamik persuttaasarnerit nakuusernerupput utikattuusut aapparisamillu imaluunniit aapparisimasamik annersaanerullutik.

Persuttaasarneq nalinginnaasumik annikitsumik aallartittarpoq piffissallu ingerlanerani ajorneruleriartortarluni. Aapparisamik persuttaasarneq qaqutiguinnaq nammineerluni unitsinneqartarpoq.

Persuttaasarnerit assigiinngitsuupput:
  • Timikkut persuttaaneq tassaavoq amerlanerit persuttaanivittut isigisagaat, tassa persuttarneqartoq timimigut anniartinneqartarmat amerlasuutigullu persuttarneqarsimanera takuneqarsinnaasarmat.
  • Tarnikkut persuttaaneq timikkut persuttaanermut sanilliullugu amerlasuutigut ersinnginnerusarpoq aamma soorlu tassaasinnaalluni ningarneq/sangianneq, sioorasaarineq, persuttakkamik nakkutiginninneq immikkoortitsinerlu.
  • Kinguaassiuutitigut pinngitsaaliineq tassaavoq alla pinngitsaalillugu kissaatiginngisaanik kinguaassiuutitigut iliuuseqarneq.
  • Atortunik aningaasanillu aserorterineq tassaavoq pillaaniarluni imaluunniit nakkutiginninniarluni allap pigisaanik aserorterineq aamma aningaasanik, nerisassanik allanillu inuunermi pisariaqartitanik tunniussiumannginneq.
  • Malersuineq tassaavoq kissaatigineqanngitsumik qaninniarpallaartumillu attaveqaqattaarnikkut allamik ajortisaarineq.
Aappaminnit persuttarneqartartut tamangajalluinnarmik persuttarneqarnerminni nakuusernernik assigiinngitsorpassuarnik misigitinneqartarput.